Pantone Color

Graphics

0 تعليق

2020-05-05

طه حسين

1462 مشاهدة

Pantone Color

الوان البانتون

يعاني المصممين من اختلاف اللون بعد الطباعة عن اللون اثناء التصميم مما يشكل مشاكل عديده لهم بالطبع ده بيحدث كثيراً وراجع للاسباب التاليه

استخدام الوان RGB في التصميم

 

وللاسف الطباعه تتم بالوان CMYK طيب ايه المشكله
المشكله ان الوان RGB مداها اللوني اكبر من CMYK (الوان RGB اكبر من الوان CMYK وبالتالي بعض الالوان موجوده في RGB ومش موجوده في CMYK)
فانت بتصمم بلون مش هيطبع في الاخر ويبقي انت مبسوط والعميل مبسوط باللون ولما تستلم الشغل من المطبعه تلاقي الالوان اتغيرت

طيب انا استخدمت CMYK وبرده الالوان بتختلف الاختلاف هنا هيكون لاسباب اخري منها
اختلاف لون الورق اللي بتطبع عليه يعني الورق الكريمي غير الورق الابيض وحتي الابيض ناصع البياض غير الابيض العادي
اختلاف نوع الورق اذا كان معالج Coated او غير معالج Uncoated (زي ورق الصحف ده غير معالج فدرجه اللون بتكون سيئة عن ورق المجلات المعالج)
اختلاف ماكينة الطباعه واختلاف الاحبار حتي واختلاف العامل اللي شغال كل ده بيؤدي لاختلاف درجة اللون حتي بدايه الطباعه ولسه ماكينه الطباعه ما اخدتش سرعتها بتختلف عن والماكينه واخدها سرعتها
حتي اختلاف الشاشه بتاعتك بتظهر اللون غير شاشه تانيه
وعلشان كده في شركات منها شركة بانتون قدمت حلول جيده لينا

الحل انها طبعت كل درجات الالوان علي ورق

وبالتالي لو انت عايز اي درجه لون هتروح تشوفها الاول وبعدين تاخد الارقام اللي معاها CMYK وتسجلهم وبكده هتحصل علي نفس اللون اللي انت شايفه مطبوع حتي لو شاشتك كانت مغلقة
بس انت قولت ان ممكن الالوان تتغير باختلاف الورق
فعلاً حصل الكلام ده وعلشان كده بانتون طبعت بانواع مختلفه وكل نوع مكتوب علي كوتشينة الالوان فمثلاً بانتون الورق المعالج واللي اغلبنا بيستخدمه مكتوب عليها Coated 

طيب لو انا عندي عميل ومعاه فلوس وعايز يطبع لون من الوان RGB زي مثلاً احمر شركة فودافون او برتقالي شركة اورنج
هنا بنتنقل لنوع تاني من الالوان اسمه الالوان Spot او الالوان الخاصة
وموضوع معاه فلوس لان الموضوع هنا هيكون تكلفته اعلي من الطباعه العادية
ودي زي ما تروح تحب تدهن شقتك او عربيتك فبيديك لون كمبيوتر جاهز
احنا برده هناخد لون جاهز مش هيمر بمراحل الالوان CMYK هيطبع مباشرة وفي العادي بيطبع بعد الالوان CMYK
طيب ده انا هعرف لونه ازاي

شركة بانتون برده قدمت كوتشينه خاصه بالالوان Spot فحضرتك هتروح تتفرج علي الالوان ولما تختار اللون هتاخد الكود بتاعه بس
وفي برامج الجرافيك الفوتوشوب او الاليستريتور او الانديزاين هتختار لون Spot وتدور علي الكود بتاعك وتلون بيه اللوجو او الارضية او حسب تصميمك
وفي المطبعة العامل هيبحث عن كود اللون بتاعك ويجيب علبه الحبر الخاصه بالكود ده ويحطها في ماكنيه الطباعه علشان تطبع

هوه الموضوع مهم قوي كده

 

اه مهم جداً تصور ان مثلاً شركه فودافون بتطبع مطبوعات وكل مطبوع بلون احمر مختلف ده بيكون عيب كبير جداً في الشركات
ولو روحت اشتغلت في شركة ادويه وعملت تصميم لعلبه دواء ولسوء حظك اللون اختلف في الطباعه بيتم اعدام كل علب الادويه امامك

شركة بانتون كل سنه بتقول ايه اللون اللي هيكون موضه العام في التصميمات ودي الوان السنين السابقة